బాలీవుడ్ ని దశాబ్దాల పాటు ఏలిన లెజెండరీ నటుడు దివంగత దేవ్ ఆనంద్, సీనియర్ నటి కల్పనా కార్తీక్ దంపతుల కుటుంబంలో తీవ్ర విషాదం నెలకొంది. వారి పెద్ద కుమారుడు, నటుడు, నిర్మాత సునీల్ ఆనంద్ (70) కన్నుమూశారు. 

అమెరికా నుంచి లండన్ మీదుగా ఇండియాకు తిరిగి వస్తున్న క్రమంలో ఆయనకు తీవ్ర గుండెపోటు వచ్చింది. దాంతో లండన్‌లో ఆయనను వెంటనే ఆసుపత్రికి తరలించారు. వైద్యులు ఆయన ప్రాణాలను కాపాడేందుకు స్టెంట్ వేయాలని నిర్ణయించారు. అయితే సర్జరీ ప్రక్రియ ప్రారంభమయ్యే లోపే ఆయనకు రెండవసారి బలమైన గుండెపోటు రావడంతో వైద్యుల బృందం చేసిన శ్రమ ఫలించలేదు. 

2026 జూలై 26, ఆదివారం నాడు సునీల్ ఆనంద్ తుదిశ్వాస విడిచారు. ఈ విషాదకరమైన వార్తను ఆయన మేనకోడలు గినా నారంగ్ జూలై 28 మంగళవారం నాడు మీడియాకు వెల్లడించారు.

ఇందులో భావోద్వేగానికి గురిచేసే విచిత్రమైన విషయమేమిటంటే, సరిగ్గా 15 ఏళ్ల క్రితం అంటే 2011 డిసెంబరులో సునీల్ తండ్రి దేవ్ ఆనంద్ లండన్‌లోని ఏ ఆసుపత్రిలోనైతే కన్నుమూశారో, అదే ఆసుపత్రిలో సునీల్ ఆనంద్ కూడా తన చివరి శ్వాస విడవడం అభిమానులను, సినీ ప్రముఖులను తీవ్రంగా కలచివేస్తోంది.

సునీల్ ఆనంద్ సినీ ప్రస్థానాన్ని పరిశీలిస్తే, తన తండ్రి దేవ్ ఆనంద్ స్వయంగా దర్శకత్వం వహించిన 'ఆనంద్ ఔర్ ఆనంద్' అనే యూత్‌ఫుల్ ఎంటర్‌టైనర్ తో 1984లో హీరోగా బాలీవుడ్ లోకి అడుగుపెట్టారు. ఆ తర్వాత ఆయన 'కార్ థీఫ్', 'మైన్ తేరే లియే', 'మాస్టర్' వంటి పలు వైవిధ్యమైన బాలీవుడ్ సినిమాల్లో నటుడిగా తన మార్కును చూపే ప్రయత్నం చేశారు. నటనతో పాటు తన కుటుంబానికి చెందిన ప్రతిష్టాత్మక బ్యానర్ 'నవకేతన్ ఫిలిమ్స్' నిర్మాణ బాధ్యతలను, నిర్వహణను కూడా ఆయన సమర్థవంతంగా పర్యవేక్షించారు. తండ్రి దేవ్ ఆనంద్ సినీ వారసత్వాన్ని, ఆయన ఆశయాలను కాపాడేందుకు సునీల్ ఆనంద్ నిరంతరం శ్రమించారు.

సునీల్ ఆనంద్ అకాల మరణం పట్ల ఆయన మేనకోడలు గినా నారంగ్ స్పందిస్తూ, సునీల్ మరణంతో తమ కుటుంబం మొత్తం కోలుకోలేని శోకసంద్రంలో మునిగిపోయిందని, తమ హృదయాలు తీవ్రంగా బరువెక్కాయని ఆవేదన వ్యక్తం చేశారు. ఈ అత్యంత కష్టసమయంలో సినీ అభిమానులు, శ్రేయోభిలాషులు చూపిస్తున్న ప్రేమ, ఆప్యాయతలకు ధన్యవాదాలు తెలుపుతూనే, తమ కుటుంబ గోప్యతను గౌరవించాలని విజ్ఞప్తి చేశారు. 

Dev Anand, Suneil Anand, Passed Away, Heart Attack